Астана медицина университетінің қабырғасында елордадағы жалпы білім беретін мектеп оқушыларына арналған «Болашақ дәрігер – ІІІ» қалалық пәндік олимпиадасы өтті. Зияткерлік сайыс жаратылыстану ғылымдарын оқуға қызығушылық танытатын және болашағын медицина саласымен байланыстыруды жоспарлаған 100-ге жуық оқушыны біріктірді.

Олимпиада университеттің кәсіби бағдар беру жұмысы аясында ұйымдастырылды. Оның басты мақсаты – дарынды оқушыларды анықтау және қолдау, медициналық мамандықтарға деген қызығушылықты арттыру, сондай-ақ бейіндік пәндерді тереңдетіп оқуға ынталандыру.

Сайыс барысында қатысушылар медицина жоғары оқу орнына түсу үшін негізгі пәндер болып саналатын биология мен химия бойынша білімдерін көрсетті. Байқау бағдарламасына теориялық сұрақтармен қатар дайындық деңгейін, логикалық ойлау қабілетін және білімді стандартты емес жағдайларда қолдана білу дағдыларын бағалауға бағытталған тәжірибелік тапсырмалар енгізілді.

Ұйымдастырушылардың, яғни университеттің қабылдау комиссиясы өкілдерінің айтуынша, мұндай іс-шаралар мектеп оқушыларына болашақ мамандығын таңдауға бағыт-бағдар беріп, медицина университетінің білім беру ортасымен жақынырақ танысуға мүмкіндік береді.

«Болашақ дәрігер – ІІІ» олимпиадасы сондай-ақ қала мектептері мен жоғары оқу орны арасындағы өзара ынтымақтастықты нығайтудың тиімді алаңына айналды.

Байқау қорытындысы бойынша жеңімпаздар мен жүлдегерлер дипломдармен және естелік сыйлықтармен марапатталды. Барлық қатысушылар дәрігер мамандығына бастар жолдағы алғашқы қадамға айналуы мүмкін құнды тәжірибе жинақтады.