Астанада балалар ауруларының алдын алу, диагностикасы мен емдеу тәсілдерінің қалай өзгеріп жатқаны талқыланды

11 қыркүйекте Астанада «Бүгінгі педиатрия: стандарттарды қайта қарау және жаңа мүмкіндіктер» атты халықаралық қатысумен өткен XXI ғылыми-практикалық конференция ұйымдастырылды. Іс-шара Медицина университеті Астана Балалар аурулары №3 кафедрасының 25 жылдығына арналды.

Конференцияны «Астана қаласы педиатрлар қауымдастығы» қоғамдық бірлестігі Медицина университеті Астананың қатысуымен және Қазақстан Республикасы Денсаулық сақтау министрлігінің қолдауымен ұйымдастырды.

Гибридті форматта өткен конференция бір алаңға Қазақстан, Түркия, Ресей және Өзбекстаннан келген екі жүзден астам педиатр дәрігерді, ғалымдарды, медициналық жоғары оқу орындарының оқытушылары мен жас мамандарды жинады.

«Қазіргі педиатрияның жаңа мүмкіндіктері» атты пленарлық сессия барысында Қазақстан Республикасындағы педиатриялық қызметтің қазіргі жағдайы мен даму перспективалары, балаларға микронутриенттік қолдау көрсету, инфекциялық-қабыну ауруларын емдеудің заманауи тәсілдері, балалар аллергологиясындағы соңғы жетістіктер және ас қорыту жүйесі ауруларын жекелендірілген емдеу мүмкіндіктері талқыланды.

Бағдарламадағы маңызды бөлімдердің бірі Қазақстан-Түркия педиатриялық форумы болды. Түркияның жетекші мамандары балалардағы артрит пен артралгияны, қайталамалы қызба синдромдарын, құрысу жағдайларын және респираторлық дистресс-синдромды диагностикалау мен емдеудің заманауи клиникалық тәсілдерін таныстырды. Сондай-ақ D дәруменін қолдану және тері бөртпесімен қатар жүретін аурулардың дифференциалды диагностикасы мәселелері қаралды.

Конференция жұмысы «Дені сау бала: тамақтану, профилактика және ерте даму», «Педиатриядағы күрделі пациент: мультидисциплинарлық тәсіл», «Орталық Азия және көршілес елдер педиатриясының сан қырлылығы: тәжірибе және клиникалық практикамен халықаралық алмасу» атты тақырыптық симпозиумдар аясында жалғасты.

Қатысушылар бала емізу, ерте даму, ішек микробиотасы, аллергиялық аурулар, респираторлық инфекциялар, бронхоэктаздар, өкпелік гипертензия, туберкулез және балалардағы муковисцидоз мәселелерін талқылады. Антибактериялық препараттарды ұтымды қолдануға, микробиотаны сақтауға және педиатриялық практикаға антибиотиктерді ұтымды қолдану қағидаттарын енгізуге ерекше назар аударылды.

Баяндамалардың негізгі ерекшелігі - олардың практикалық бағыттылығы. Сарапшылар күрделі клиникалық жағдайларды, заманауи диагностикалық алгоритмдерді және ғылыми зерттеулер нәтижелерін педиатр мен жалпы практика дәрігерінің күнделікті жұмысына енгізу мүмкіндіктерін талдады.

Конференция ауқымды ғылыми шара ғана емес, сонымен қатар Балалар аурулары №3 кафедрасының 25 жылдығына арналған мерейтойлық бағдарламаның маңызды бөлігіне айналды. 25 жыл ішінде кафедрада дәрігерлерді клиникалық даярлау, жоғары оқу орнынан кейінгі білім беру, ғылыми-зерттеу қызметі және балаларға медициналық көмек көрсету жүйесіне заманауи технологияларды енгізу бағыттарында тұрақты дәстүрлер қалыптасты.

«Кафедраның 25 жылдығы - өткенге қорытынды жасап қана қоймай, жаңа бағдарларды айқындауға мүмкіндік беретін маңызды белес. Қазіргі педиатрия білімді үнемі жаңартып отыруды, мультидисциплинарлық өзара іс-қимылды және ашық халықаралық диалогты талап етеді. Біздің ортақ міндетіміз - озық ғылыми жетістіктерді әр дәрігерге қолжетімді етіп, оларды баланың денсаулығын сақтауға бағыттау», - деді «Астана қаласы педиатрлар қауымдастығы» қоғамдық бірлестігінің президенті, Медицина университеті Астана Балалар аурулары №3 кафедрасының меңгерушісі, медицина ғылымдарының докторы Сагира Абдрахманова.