2026 жылғы 14–16 қазан аралығында Шымкент қаласында Оңтүстік Қазақстан медицина академиясының базасында хирургиялық пәндер бойынша IV Халықаралық практикалық олимпиада өтті. Байқауда Төрегелді Шарманов атындағы Ұлттық медицина университетінің профессор Г.В.Цой атындағы Хирургия ғылыми-білім беру орталығының «Veritas» және «Surgery Trends» командалары табысты өнер көрсетті.

Халықаралық олимпиада медициналық жоғары оқу орындарының студенттерін біріктіріп, қатысушыларға кәсіби білімдері мен практикалық дағдыларын көрсетуге, сондай-ақ күрделі клиникалық міндеттерді шешуге дайындық деңгейін танытуға мүмкіндік берді.

Жарыс бағдарламасы хирургияның түрлі бағыттары бойынша теориялық және практикалық сынақтарды қамтыды. Қатысушылар топографиялық анатомия бойынша білімдерін, хирургиялық құрал-жабдықтарды меңгеру деңгейін, операциялық араласуларды орындау техникасын, клиникалық ойлау қабілетін және командада тиімді жұмыс істеу дағдыларын көрсетті.

Байқау қорытындысы бойынша «Veritas» және «Surgery Trends» командалары барлығы 11 жүлделі орынға ие болды. Оның ішінде бес бірінші, бір екінші және бес үшінші орын бар.

I орын:

Травматология — сіңірге тігіс салу;

Абдоминалдық хирургия;

Қол хирургиясы;

Пластикалық хирургия;

Кардиохирургия.

II орын:

Хирургиялық құрал-жабдықтарды білу.

III орын:

Десмургия;

Абдоминалдық хирургия;

Нейрохирургия;

Пирогов анатомиясы;

Кеңірдек интубациясы.

Қол жеткізілген нәтижелер университет студенттерінің теориялық және практикалық даярлығының жоғары деңгейін, олардың кәсіби шеберліктерін шыңдауға деген ұмтылысын, сондай-ақ профессор Г.В.Цой атындағы Хирургия ғылыми-білім беру орталығы тәлімгерлерінің тиімді жұмысын көрсетеді.

Халықаралық жарыстарға қатысу болашақ дәрігерлердің кәсіби құзыреттерін дамытуға, хирургиялық шеберлігін жетілдіруге, басқа медициналық жоғары оқу орындарының өкілдерімен тәжірибе алмасуға және жоғары оқу орындары арасындағы ынтымақтастықты нығайтуға ықпал етеді.

«Veritas» және «Surgery Trends» командаларының табысты өнер көрсетуі Төрегелді Шарманов атындағы Ұлттық медицина университетінің студенттік хирургиялық қауымдастығы үшін маңызды жетістік болды. Бұл нәтиже хирургия саласындағы болашақ мамандардың жоғары дайындық деңгейін тағы бір мәрте дәлелдеді.

«Veritas» және «Surgery Trends» командаларының қатысушыларын, жетекшілері мен тәлімгерлерін лайықты марапаттарымен құттықтаймыз! Оқу, ғылыми және кәсіби қызметтеріне толағай табыс тілейміз!