Жеті бала тәрбиелеп отырған, кәсіби мақсаттарын жүзеге асырып, өзара құрмет пен қолдау дәстүрін берік ұстанған отбасы Астана қаласында өткен «Мерейлі отбасы» ұлттық байқауының қалалық кезеңінде жеңіске жетті. Бұл – ана болу бақыты, отбасылық құндылықтар және шаңырақ пен сүйікті іс арасындағы үйлесімділікті сақтай білудің жарқын үлгісі.

Төрегелді Шарманов атындағы Ұлттық медицина университетінің Ш.И.Сарбасова атындағы микробиология, вирусология және иммунология кафедрасының аға оқытушысы Гүлбану Дүйсебекова жұбайымен бірге жеті бала тәрбиелеп отыр. 2026 жылы отбасы «Мерейлі отбасы» байқауына алғаш рет қатысып, бірден жоғары нәтиже көрсетіп, қалалық кезеңнің жеңімпазы атанды. Бұл жеңіс Дүйсебековтер отбасына елорда намысын республикалық деңгейде қорғауға мүмкіндік берді.

3 қарашада отбасы Қазақстанның түрлі өңірлерінен жиналған отбасылар бас қосқан байқаудың республикалық кезеңіне қатысты. Қатысушылардың назарына тек отбасылық жетістіктер ғана емес, берекелі шаңырақтың негізін қалайтын құндылықтар да ұсынылды. Атап айтқанда, аға буынға құрмет, салт-дәстүр сабақтастығы, өзара түсіністік, жауапкершілік пен бала тәрбиесіне деген қамқорлық ерекше мәнге ие болды. Республикалық кезеңге қатысқан барлық отбасылар марапаттар мен ақшалай сертификаттарға ие болды.

Гүлбану Дүйсебекова үшін тағы бір маңызды оқиға – ана болу бақытына, өскелең ұрпақ тәрбиесіне және рухани-адамгершілік құндылықтарды сақтауға арналған «Ұлы ана» байқауына қатысуы.

Бұл жетістіктердің артында күнделікті тынымсыз еңбек, қамқорлық пен үлкен жауапкершілік жатыр. Гүлбану Дүйсебекова университетте 17 жылдан бері еңбек етіп, болашақ медицина мамандарына білімі мен тәжірибесін үйретіп келеді. Сонымен қатар ол кәсіби қызметпен ғана шектелмей, бала тәрбиесін, отбасылық дәстүрлерді сақтауды және жеке дамуды өміріндегі басты басымдықтар санайды.

Кейіпкеріміздің айтуынша, өмірдің әр саласынан шабыт таба білу және жақындарының қолдауы – үйлесімділіктің басты сыры. Ол үшін отбасы – үлкен жауапкершілік қана емес, алға ұмтылуға күш беретін ең сенімді тірек.

«Мен үшін отбасы – өмірдегі ең үлкен бақыт әрі басты тірегім. Әр баланың өзіне тән мінезі, арманы мен қабілеті бар. Жолдасым екеуміз балаларымызды сүйіспеншілік, құрмет, сенім және өзара көмекке негізделген ортада тәрбиелеуге тырысамыз. Әрине, өмірде түрлі жағдайлар болады. Бірақ ең бастысы – қандай жағдай болса да, бір-біріңнің жаныңнан табылып, қолдау көрсете білу», – дейді Гүлбану Дүйсебекова.

Отбасында ата-ананың жеке үлгісіне де ерекше мән беріледі. Гүлбанудың пікірінше, балалар ең алдымен үлкендердің бір-біріне деген қарым-қатынасынан үлгі алып, күнделікті отбасылық өмірді бақылау арқылы қамқорлықты, жауапкершілік пен сыйластықты үйренеді.

Жас отбасыларға айтар кеңесінде ол қарым-қатынастың мінсіз үлгісін іздеуден гөрі, бір-бірін тыңдай білуге, сенімді сақтауға және қарапайым көңіл бөлудің қадірін түсінуге шақырады.

«Мінсіз отбасы болуға ұмтылудың қажеті жоқ, өйткені мінсіз адам болмайды. Ең бастысы – бір-біріңмен ашық сөйлесу, кешіре білу, қиын сәттерде қолдау көрсету және қолда бардың қадірін бағалау. Балалар біздің сөзімізден гөрі іс-әрекетімізден көбірек үлгі алады. Егер шаңырақта сүйіспеншілік, құрмет пен өзара түсіністік болса, олар осы құндылықтарды өмір бойы бойына сіңіріп өседі», – дейді ол.

Дүйсебековтер отбасының тарихы – сүйіспеншілік пен өзара қолдаудың күнделікті тұрмыстық қиындықтарды еңсеруге, әр баланың қабілетін ашуға және кәсіби мақсаттарға жетуге көмектесетінінің айқын көрінісі. Байқаудағы жеңіс Гүлбану мен жұбайының күнделікті өмірде ұстанып жүрген отбасылық құндылықтарына берілген қоғамдық баға болды.

Гүлбану Дүйсебекованы және оның отбасын «Мерейлі отбасы» байқауының қалалық кезеңіндегі жеңісімен және республикалық кезеңдегі лайықты өнер көрсетуімен құттықтаймыз! Отбасына зор денсаулық, амандық, шаңырақ шаттығы мен толағай табыстар тілейміз!