Өз бетінше жүру, жұмысқа оралу, спорт алаңына қайта шығу — Төрегелді Шарманов атындағы Ұлттық медицина университетінде өтіп жатқан спорттық медицина және оңалту жөніндегі конференция баяндамаларын осы міндеттер біріктіреді. Бағдарламада Қазақстан, Оңтүстік Корея, Австралия, Нидерланд, Ұлыбритания, Ресей, Қытай және Өзбекстан мамандарының баяндамалары ұсынылған.

Заманауи оңалту пациенттің жеке мақсаттарымен тығыз байланысып келеді. Қатысушылар адамның күнделікті тұрмыстық міндеттерді орындауына, инсульттен кейін дербестігін қалпына келтіруіне және қимыл-қозғалыс дағдыларын қайта меңгеруіне қалай көмектесуге болатынын талқылауда. Балаларды оңалтуға арналған баяндамаларда қимыл-қозғалысты дамыту және түрлі бейіндегі мамандардың бірлескен жұмысы қарастырылады.

Спорттық медицинада жарақаттың алдын алу, жүрек жұмысындағы өзгерістерді ерте анықтау және жаттығуға оралу өлшемдері сөз болады. Психологиялық сүйемелдеу жөніндегі баяндамалар спортшыларға жарақаттан және маңызды жарыстағы жеңілістен кейін көмек көрсетуге арналған.

Бағдарламаның технологиялық бөлігі жүруді роботтандырылған құрылғылар арқылы түзетуді, антигравитациялық жаттығуларды және пациенттерді қашықтан сүйемелдеуді қамтиды. Жас ғалымдар оңалту кезіндегі тәуекелдерді бағалау мен нәтижелерді болжау үшін жасанды интеллектіні, сондай-ақ жүру мен тепе-теңдікті қалпына келтіруге арналған мобильді қосымшаларды қолдану туралы жұмыстарын ұсынады