Астана медицина университетінде 2025 жылғы Дүниежүзілік бүйрек күніне арналған ғылыми-практикалық конференция өтті. Бүйректің созылмалы ауруларын (БСА) диагностикалау, емдеу және алдын алудың заманауи тәсілдері, сондай-ақ науқастарды бақылау және нутритивтік қолдау мәселелері басты назарда болды.
Конференцияны ашқан университет проректоры Айгуль Жунусова жас мамандардың нефрологияға деген қызығушылығының артуының маңыздылығын атап өтті:
«Жас дәрігерлер арасында нефрологияға деген қызығушылықтың артып келе жатқанын көру қуантады. Егер бұрын біз жылына 15 резидент дайындайтын болсақ, қазір олардың саны 30-ға жетті. Бұл саналы таңдау, өйткені бүйрек аурулары тек Қазақстан үшін ғана емес, бүкіл әлем үшін өзекті мәселелердің бірі болып қала береді».
Талқылауға еліміздің жетекші нефрологтары, оның ішінде Нефрологияны үйлестіру жөніндегі республикалық орталықтың басшысы Венера Алтынова, профессор Думан Туребекова, доцент Гүлжан Ерлесова, сондай-ақ нефролог-резиденттер Диана Жарылқап пен Асель Тулежанова қатысты.
Сарапшылар нефрологиядағы негізгі қиындықтарды, соның ішінде артериялық гипертензияны, қосалқы аурулардың асқынуын және пәнаралық тәсілдің маңыздылығын талқылады. ҚР ДСМ бас штаттан тыс нефрологы Салтанат Туғанбекова атап өтті:
«Біз күрделі пациенттерді диагностикалау мен емдеуде бір-бірімізге тірек болуымыз керек, олардың жағдайындағы өзгерістерге уақытында жауап беруіміз керек. Клиникалық тәжірибеге қайта оралып, нақты жағдайларды талқылау дәрігерлердің дұрыс шешім қабылдауына көмектеседі».
Қазақстандағы бүйрек трансплантациясының өзекті мәселелері ерекше назарға алынды. Ұлттық бүйрек қорының вице-президенті Бағдат Султанова трансплантацияның сәтсіз жағдайларының негізгі себептерін және олардың алдын алу жолдарын талдады. Ота алдындағы дайындық сапасын жақсарту, сондай-ақ науқастарды операциядан кейін бақылау елдегі трансплантациялардың сәттілік көрсеткішін арттыруға көмектеседі деген тұжырым жасалды.
Конференция тәжірибе алмасу, БСА диагностикасы мен емдеудің заманауи әдістерін талқылау, сондай-ақ Қазақстанда нефрологиялық көмекті жетілдіру стратегиясын әзірлеу үшін маңызды платформаға айналды. Ерте скринингтің, терапияны уақтылы бастаудың және пәнаралық тәсілдің маңыздылығына ерекше назар аударылды.
Қатысушылар нефрологтар, терапевтер, кардиологтар және МСАК дәрігерлері арасындағы ынтымақтастықты нығайту қажеттігін атап өтті. Конференция бүйрек ауруларын емдеуге кешенді көзқарас, диагностиканың заманауи әдістерін қолдану және білім беру бағдарламаларын дамыту медициналық көмектің сапасын арттырeға және елдегі бүйрек ауруларының теріс әсерін азайтуға көмектесетінін көрсетті.
