Астана медицина университетінде кинезитерапия және эрготерапия мамандарын даярлауды дамытуға, сондай-ақ оларды одан әрі жұмысқа орналастыруға арналған дөңгелек үстел өтті. Іс-шараны Мейіргер ісі мектебі мен реабилитология және спорттық медицина кафедрасы ұйымдастырды.
Дөңгелек үстелге ҚР Денсаулық сақтау министрлігі мен Еңбек және халықты әлеуметтік қорғау министрлігінің өкілдері, оңалту жөніндегі штаттан тыс бас мамандар, медициналық ұйымдар мен оңалту орталықтарының басшылары, сондай-ақ бейінді білім беру бағдарламаларының оқытушылары, студенттері мен түлектері қатысты. «Астана медицина университеті» КеАҚ проректоры Айгуль Жунусова, Денсаулық сақтау сарапшысы Гулзия Бидатова, реабилитология және спорттық медицина кафедрасының меңгерушісі Наталья Сливкина, сондай-ақ ҚР ДСМ штаттан тыс бас мамандары Ғалия Жаңаспаева мен Мейрам Шакенов баяндама жасады.
Сарапшылар Қазақстанда кинезитерапия мен эрготерапияны енгізудің негізгі мәселелерін, кадрлар даярлауды, сондай-ақ денсаулық сақтау жүйесінің осы мамандарға қажеттілігін талқылады. Қоғам мен медицина саласы мамандарын осы бағыттардың маңыздылығы мен қажеттілігі туралы хабардар етуге ерекше назар аударылды.
Дөңгелек үстел қорытындысы бойынша қатысушылар бірқатар ұсыныстар әзірледі:
· Кинезитерапевт және эрготерапевт мамандықтарын насихаттау бойынша жұмысты күшейту, оңалту жүйесіндегі осы мамандардың рөлі туралы жұртшылық пен медициналық ұйымдардың хабардарлығын арттыру.
· Кинезитерапия және эрготерапия саласында кадрлар даярлауға білім беру гранттарын бөлу туралы сұраныстарды үйлестіру.
· Мамандардың мәртебесі мен қызметтік міндеттерін нақтылау үшін нормативтік-құқықтық актілерге өзгерістер енгізу, сондай-ақ медициналық оңалту жүйесіндегі кадрлық нормативтерді қайта қарау.
Дөңгелек үстелдің нәтижелері Қазақстанда кинезитерапия мен эрготерапияны одан әрі дамытуға көмектеседі. Мамандарды даярлауды жақсартып қана қоймай, олардың табысты жұмысқа орналасуына жағдай жасау да маңызды. Білім беру мекемелерінің, медициналық ұйымдардың және мемлекеттік құрылымдардың өзара іс-қимылы осы бағыттарды оңалту жүйесіне тиімді енгізуге және оны пациенттер үшін қолжетімді әрі сапалы етуге мүмкіндік жасайды.
