Жыл сайын 24 наурызда әлем Туберкулезге қарсы күрес күнін атап өтеді. Бұл күннің мақсаты – миллиондаған адамның денсаулығына қауіп төндіретін ең күрделі инфекциялық аурулардың біріне қоғамның назарын аудару. Датаның таңдалуы да бекер емес: дәл осы күні, 1882 жылы неміс микробиологы Роберт Кох туберкулез қоздырғышын – бүгінде «Кох таяқшасы» деген атпен белгілі бактерияны ашқанын жариялады. Бұл жаңалық медицинаның дамуындағы маңызды бетбұрыс болып, ауруды диагностикалау мен емдеудің алғашқы әдістерін жасауға мүмкіндік берді.

Туберкулез – микобактериялар тудыратын инфекциялық ауру. Көп жағдайда ол өкпені зақымдайды, бірақ басқа мүшелерге де әсер етуі мүмкін. Ауру ауа арқылы тарайды және бастапқы кезеңінде айқын белгілер байқалмайды, бұл оны одан да қауіпті етеді. Дүниежүзілік денсаулық сақтау ұйымының (ДДСҰ) мәліметтері бойынша, күн сайын туберкулезден 4100-ден астам адам қайтыс болады, ал әлемде күн сайын шамамен 30 000 жаңа жағдай тіркеледі.

         Ғылым мен медицинаның жетістіктеріне қарамастан, туберкулез әлі күнге дейін әлемдегі өлім-жітімнің негізгі он себебінің бірі болып отыр. Бұл аурудың қоздырғыштары мутацияға ұшырап, дәріге төзімді түрлерінің пайда болуына әкелуде. Мұндай жағдайлар ауруды емдеуді күрделендіріп, ұзағырақ емдеу курсын қажет етеді.

Туберкулездің алдын алу және емдеу үшін қолданылатын негізгі шаралар:

• Вакцинация. 1921 жылы алғаш қолданылған БЦЖ вакцинасы бүгінгі күнге дейін балаларды туберкулезден қорғаудың ең тиімді әдісі болып қала береді.
• Ерте диагностика. Жыл сайын флюорографиялық тексерістен өту – ауруды ерте анықтап, дер кезінде ем бастауға мүмкіндік береді.
• Кешенді емдеу. 6 айдан 24 айға дейін бірнеше арнайы препараттарды қабылдау арқылы ауруды толық емдеуге болады.
• Иммундық жүйені қолдау. Дұрыс тамақтану, дене белсенділігі және салауатты өмір салты туберкулездің алдын алуда маңызды рөл атқарады.

         2025 жылы Дүниежүзілік туберкулезге қарсы күрес күні «Иә, біз туберкулезді жоя аламыз! Міндеттемелер, инвестициялар, нәтиже!» ұранымен өтеді. Бұл кампанияның басты мақсаты – мемлекет, медицина қауымдастығы және қоғам күштерін біріктіріп, бұл ауруды түбегейлі жеңудің маңыздылығын көрсету.

Астана медициналық университеті ДДСҰ бастамаларын қолдайды және студенттерді, дәрігерлерді, сондай-ақ барша қоғамды туберкулездің алдын алу шараларына белсенді қатысуға, ақпараттандырылу деңгейін арттыруға және өз денсаулығына жауапкершілікпен қарауға шақырады.