11 СӘУІР — ПАРКИНСОН АУРУЫНА ҚАРСЫ БҮКІЛӘЛЕМДІК КҮН
11 СӘУІР — ПАРКИНСОН АУРУЫНА ҚАРСЫ БҮКІЛӘЛЕМДІК КҮН
11 сәуір — британдық дәрігер Джеймс Паркинсонның дүниеге келген күні. Ол алғаш рет бұл ауруды ғылыми сипаттап жазған. Осы күнді бүкіл әлемде Паркинсон ауруына қарсы күрес күні ретінде атап өтеді. Бұл — ерте диагностиканың маңыздылығын, емдеудегі көпсалалы тәсілдің қажеттілігін және ең бастысы — бұл дертпен өмір сүріп жүрген адамдарды қолдаудың маңызын еске салатын күн.
Паркинсон ауруы әртүрлі белгілермен көрінеді, бірақ көбінесе қол-аяқтың жеңіл дірілімен, қозғалыстың баяулауымен және бұлшықет сіресуімен басталады. Аурудың кейінгі сатыларында сөйлеу, тепе-теңдік, когнитивтік функциялар бұзылуы мүмкін. Дегенмен, қазіргі таңда қолданылатын дәрілік, хирургиялық және оңалту әдістері арқылы пациенттердің өмір сапасын едәуір жақсартуға болады.
Астана медицина университеті нейродегенеративті аурулар мәселесіне білім беру бағдарламаларында, ғылыми зерттеулер мен клиникалық тәжірибеде айрықша көңіл бөледі. Біз үшін болашақ дәрігерлерді даярлау — бұл тек білім беру емес, сонымен қатар жанашырлық, эмпатия мен жауапкершілік қалыптастыру.
Осы күні біз студенттерді, оқытушыларды, дәрігерлерді және барлық жауапты азаматтарды: Паркинсон ауруы туралы көбірек білуге, мұндай пациенттермен жұмыс істейтін мамандармен сөйлесуге, ағарту іс-шараларына қатысуға және ақпараттық науқандарды қолдауға шақырамыз.
Әрбір назар, әрбір сөз, әрбір бастама — осы аурумен күресте үміт пен абыройын жоғалтпаған адамдарға жасалған қадам.
