Астана медицина университетінің магистранттары Асем Муратбекова мен Толеген Борашев қол қойылған меморандум аясында Қытайдың Шэньчжэнь қаласында Сунь Ятсен университеті (SYSU) ұйымдастырған Халықаралық жазғы мектепке қатысты. Бағдарлама әлемнің жас зерттеушілерін біріктіріп, білім, ғылыми ойлар мен мәдени тәжірибе алмасудың алаңына айналды.

Төрт апта бойы қатысушылар қазіргі ғылымның ең өзекті бағыттарын – геномика, биоинформатика, машиналық оқыту және жасанды интеллектті терең меңгерді.

Алғашқы күндері назар ғылыми негіздерге аударылды: жоғары өнімді секвенирлеу, геномның ассоциативтік талдауы (GWAS), тұқым қуалаушылық пен полигенді тәуекелдерді бағалау (PRS) әдістері қарастырылды.

Келесі кезеңде бағдарлама қолданбалы зерттеулерге арналды: патогендердің геномикасы, жұқпалы ауруларды модельдеу және деректерді болжау мен талдауда AI технологияларын қолдану.

Ерекше әсер қалдырған сәттердің бірі – BGI зерттеу орталығы мен «Space-Time» инновациялық кешеніне бару болды. Онда қатысушылар молекулалық биология мен геномдық талдаудың озық технологияларымен танысты.

Жазғы мектептің соңғы кезеңі жобалық жұмыстарға арналды. Студенттер өз зерттеулерін ұсынып, үлкен деректерді талдау, визуализация және биоинформатика бойынша дағдыларын көрсетті. Қазақстандық магистранттар үшін бұл білімді бекітіп қана қоймай, халықаралық ғылыми ортада өздерін танытуға мүмкіндік берді.

Сонымен қатар, бағдарлама түрлі елдерден келген әріптестермен байланыс орнатуға, тәжірибе және биомедицина дамуына қатысты көзқарас алмасуға жол ашты.

Айта кету керек, Шэньчжэньдегі оқу тек академиялық кезеңмен шектелмей, кәсіби дамуға үлкен серпін берді. Алынған білім мен практикалық дағдылар ғылыми зерттеулерде де, болашақ дәрігерлік тәжірибеде де сұранысқа ие болмақ.