2025 жылғы қазан айынан бастап Астана Медицина Университеті мектеп оқушылары мен студенттердің қызығушылығын арттыратын маңызды орталыққа айналды. Университеттің қабырғасында жыл сайын өтетін әлеуметтік маңызды жоба – «Астана қаласының 7–11 сынып оқушылары мен колледж студенттері үшін кәсіби бағдарлау экскурсиялары» ұйымдастырылып, жастарға болашақ мамандықты саналы түрде таңдауына мүмкіндік берді.
Бұл бастама «Astana Art Group» ЖШС мен «Astana Tourism» туризмді дамыту орталығы ЖШС бірлесіп жүзеге асырды, жоба астана әкімдігінің Инвестициялар және кәсіпкерлікті дамыту басқармасының қолдауымен өтті. Жобаның басты мақсаты – жас қатысушыларға медицина саласын тек абстрактілі бағыт емес, өміршең, сұранысқа ие әрі әлеуметтік маңызды сала ретінде таныстыру.
Экскурсиялар барысында қатысушылар университеттің заманауи зертханалары мен оқу аудиторияларын аралап, кампустың инфрақұрылымымен танысты. Сондай-ақ, материалдық-техникалық базаның деңгейін бағалап, денсаулық сақтау жүйесіндегі кәсіби өсу мүмкіндіктері туралы ақпарат алды.
Кездесулердің ең қызықты бөлігі – оқытушылар мен студенттермен тікелей қарым-қатынас болды. Болашақ абитуриенттерге медициналық білімнің ерекшеліктері, студенттік өмірдің қызықтары және жас мамандарға арналған практикалық дайындық жолдары туралы жан-жақты мәлімет берілді.
Жыл сайынғы кәсіби бағдар беру экскурсиялары Астана Медицина Университетінің әлеуметтік және білім беру миссиясының маңызды бөлігіне айналды. Жоба білім беру мекемелері мен жастар арасындағы байланысты нығайтып, медицинаға деген қызығушылықты арттырады және елдің денсаулық сақтау жүйесінің кадрлық әлеуетін дамытуға өз үлесін қосады.
