2026 жылғы 23 қаңтарда Астана қаласындағы №12 қалалық емханада «Жалпы практика дәрігерінің жұмысындағы B, C, D созылмалы вирусты гепатиттері» тақырыбында медициналық қызметкерлерге арналған семинар өтті. Іс-шараны ішкі аурулар №3 кафедрасының профессоры, медицина ғылымдарының докторы Венера Рахметова жүргізді.
Семинар барысында B, C және D созылмалы вирусты гепатиттерін диагностикалау, емдеу және диспансерлік бақылаудың заманауи тәсілдері кеңінен талқыланды. Алғашқы медициналық-санитарлық көмек деңгейінде жиі кездесетін клиникалық көріністерге, сондай-ақ бауырдың вирустық зақымдануларының эпидемиологиясы мен патогенезіне ерекше назар аударылды.
Кездесу аясында науқастарды тексерудің нақты алгоритмдері, зертханалық көрсеткіштерді дұрыс интерпретациялау ерекшеліктері және вирусқа қарсы терапия тағайындаудың негізгі қағидалары ұсынылды. Сонымен қатар, науқастарды жүргізудің практикалық аспектілері, бауыр циррозы мен гепатоцеллюлярлы карцинома сияқты ауыр асқынулардың алдын алу жолдары және медициналық көмектің әртүрлі деңгейлері арасындағы өзара әрекеттестік мәселелері қарастырылды.
Қатысушылар тарапынан, әсіресе, инфекция жұқтыру қаупі жоғары топтардағы науқастарда вирусты гепатиттердің дифференциалды диагностикасына қатысты сұрақтар үлкен қызығушылық тудырды.
Осындай білім беру іс-шаралары ішкі аурулар №3 кафедрасының медициналық қызметкерлердің кәсіби біліктілігін арттыруға және заманауи клиникалық тәжірибені денсаулық сақтау жүйесіне енгізуге бағытталған белсенді жұмысын көрсетеді.
