05.02.2026

4 ақпан — Халықаралық онкологиялық аурулармен күрес күні*

Жыл сайын 4 ақпанда бүкіл әлемде Халықаралық онкологиялық аурулармен күрес күні атап өтіледі. Бұл күн 2000 жылы Қатерлі ісікке қарсы халықаралық одақтың (UICC) бастамасымен онкологиялық аурулар туралы қоғамның хабардарлығын арттыру, науқастар мен олардың отбасыларына қолдау көрсету, сондай-ақ қатерлі ісіктің әлеуметтік-экономикалық салдарын азайту мақсатында белгіленген.

Онкологиялық аурулар әлем бойынша өлім-жітімнің жетекші себептерінің бірі болып қалып отыр. Жыл сайын бұл дерт шамамен 10 миллион адамның өмірін қияды. Осы күресте заманауи диагностикалау, емдеу және алдын алу әдістерін әзірлеп, тәжірибеге енгізетін дәрігер-онкологтардың рөлі ерекше. Сондықтан бұл күнді науқасты емдеудің барлық кезеңінде бірге жүріп, терапияның жанама әсерлерін еңсеруге көмектесетін және өмір сапасын жақсартуға үлес қосатын онколог-дәрігердің кәсіби мерекесі деуге болады.

Онколог-дәрігерлер әрбір науқасқа жеке емдеу бағдарламаларын әзірлеп, озық медициналық технологияларды қолданады және медициналық көмектің тиімділігін арттыру мақсатында өз біліктілігін үнемі жетілдіріп отырады.

Халықаралық онкологиялық аурулармен күрес күні профилактиканың, ерте диагностиканың және заманауи медициналық тәсілдерді енгізудің маңыздылығын тағы бір мәрте еске салады. НАО «Медицина университеті Астана» онкология кафедрасы онкологиялық ғылым мен практиканы белсенді түрде дамытып, жоғары білікті мамандар даярлауға, инновациялық диагностикалық және емдеу әдістерін енгізуге, сондай-ақ білім беру және клиникалық үдерістерді жетілдіруге ерекше көңіл бөледі.

Халықаралық онкологиялық аурулармен күрес күні аясында медицина ғылымдарының докторы, профессор, онкология кафедрасының меңгерушісі Макишев Абай Қайырғожинұлының жетекшілігімен кафедра қызметкерлері Ашық есік күнін өткізді. Іс-шара халық арасында онкологиялық сақтықты арттыруға, профилактикалық шаралар мен ерте диагностиканың мүмкіндіктері туралы ақпарат беруге бағытталды.

Ашық есік күніне қатысушылар мамандардан кеңес алып, скринингтік бағдарламалар мен алдын алу шаралары бойынша түсіндірулермен танысты, сондай-ақ медициналық көмекке уақытылы жүгінудің маңыздылығы туралы ұсыныстар алды.

НАО «Медицина университеті Астана» онкология кафедрасы Ашық есік күніне қатысқан барлық азаматтарға алғысын білдіре отырып, профилактика мен тұрақты медициналық тексерулердің денсаулық пен сапалы өмірдің негізі екенін еске салады. Уақтылы тексеруден өту және дәрігерге ерте жүгіну ауруды бастапқы кезеңде анықтауға және емдеудің тиімділігін едәуір арттыруға мүмкіндік береді.