2026 жылғы 30 қаңтарда С.Д. Асфендияров атындағы Қазақ ұлттық медицина университеті базасында Астана медицина университеті PhD-докторанты Айсулу Капасованың «Қазақстан Республикасындағы пациенттерде целиакияны диагностикалау және клиникалық ағымының ерекшеліктері» тақырыбындағы диссертациясын қорғау рәсімі өтті.
Докторант зерттеу жұмысының өзектілігін негіздеп, Қазақстан Республикасындағы пациенттер арасында целиакияны диагностикалау мен аурудың клиникалық ағымының ерекшеліктеріне қатысты маңызды ғылыми нәтижелерді ұсынды. Жұмыс жоғары теориялық және практикалық дайындық деңгейін көрсетті.
Целиакия — глютенге жауап ретінде жіңішке ішектің шырышты қабығы зақымданатын созылмалы аутоиммундық ауру. Ауруды емдеудің негізгі тәсілі — өмір бойы қатаң глютенсіз диетаны сақтау.
Целиакияны уақтылы анықтау ауыр асқынулардың, соның ішінде жіңішке ішектің қатерлі ісіктерінің, репродуктивтік бұзылыстардың, остеопороздың, айқын микронутриенттік тапшылықтардың және неврологиялық бұзылыстардың алдын алуға мүмкіндік береді.
Диссертациялық кеңес мүшелері докторанттың ғылыми еңбегіне жоғары баға беріп, мазмұнды баяндамасы мен қойылған сұрақтарға дәлелді жауаптарын атап өтті.
Диссертациялық жұмыс Астана медицина университеті жалпы дәрігерлік практика кафедрасында дәлелді медицина курсы аясында орындалды.
Ғылыми кеңесшілердің бірі — Дербисалина Гульмира Ажмадиновна, медицина ғылымдарының кандидаты, қауымдастырылған профессор, Астана медицина университеті жалпы дәрігерлік практика кафедрасының дәлелді медицина курсы бойынша меңгерушісі.
