14 наурызда Қазақстанда Көрісу күні – Амал мерекесі атап өтіледі. Бұл мереке Наурыз мейрамы қарсаңындағы онкүндік — Наурызнама мерекелік кезеңінің бастауын білдіреді.

Көрісу күні халық арасында Амал мерекесі деп те аталады. Бұл күн ұзаққа созылған қыстан кейінгі жылы жүздесулерді, табиғаттың жаңаруын, адамдар арасындағы байланыстың нығаюын және үлкен буынға деген құрметті білдіреді. Дәстүр бойынша бұл күні адамдар туыстарын, достарын, көршілерін арнайы барып құттықтап, олардың хал-жағдайын сұрап, бір-біріне ізгі тілектер айтып, үлкендерге құрмет көрсетеді.

Мерекенің түп-тамыры қазақ халқының көшпелі өмір салтымен тығыз байланысты. Қыс мезгілі ең ауыр кезеңдердің бірі саналған: қатты аяз, боран мен табиғаттың түрлі сынақтары кейде адамдарды ұзақ уақытқа бір-бірінен алыстатып отырған. Сондықтан көктемнің келуі айрықша қуанышпен қарсы алынып, ұзақ уақыт көріспеген жақындармен қайта қауышу үлкен мерекеге айналған.

«Амал» атауы көне күнтізбелік және астрономиялық түсініктермен байланысты. Зерттеушілердің пікірінше, бұл сөз Күн осы кезеңде өтетін Тоқты шоқжұлдызы — Хамал атауымен байланыстырылады. Сондықтан халықтық дәстүрде 14 наурыз табиғаттың жаңарып, жаңа жылдың басталуын білдіретін ерекше күн ретінде қабылданған.

Іс-шара барысында қатысушылар Көрісу күні – Амал мерекесінің шығу тарихы мен мерекелеу дәстүрлері туралы мағлұмат алды. Әсіресе үлкен туыстар мен ақсақалдардың үйіне барып, құрмет көрсетіп, олардың батасын алу дәстүріне ерекше назар аударылды.

Дәстүр бойынша адамдар бір-бірімен құшақтасып, «Бір жасыңмен!» немесе «Жасың құтты болсын!» деп құттықтайды. Бұл сөздер арқылы денсаулық, амандық, бақ-береке және ұзақ ғұмыр тілейді.

Көрісу күні – Амал мерекесі адамдарды жақындастырып, өзара сыйластық пен ұрпақтар сабақтастығының маңызын еске салады. Бұл мереке қоғамға жылулық, татулық пен көктемгі жаңару рухын сыйлайды.