2026 жылғы 12 наурызда Астана медицина университеті базасында Дүниежүзілік бүйрек күніне арналған ғылыми-тәжірибелік конференция өтті. Іс-шара «Баршаға – сау бүйрек: адамдарға қамқор болып, планетаны қорғайық» ұранымен ұйымдастырылды.

Конференцияны университеттің Ішкі аурулар №4 кафедрасы Қазақстан Республикасының Ұлттық бүйрек қорымен бірлесіп өткізді.

 Жиынды университет проректоры Зарина Шульгау ашып, бүйрек ауруларын ерте анықтаудың маңыздылығына ерекше тоқталды. Оның айтуынша, бүйрек ауруларының бастапқы кезеңдері көбіне айқын белгілерсіз өтеді. Сондықтан профилактика, дер кезінде анықтау және емдеуді уақытылы бастау – науқастың өмір сапасын сақтауда шешуші рөл атқарады.

Бүгінде нефрология саласы қарқынды дамып келеді: диагностика мен емдеудің жаңа тәсілдері енгізілуде, бүйрек қызметін алмастыру терапиясының технологиялары жетілдіріліп, трансплантация мүмкіндіктері кеңейіп жатыр. Сонымен қатар бүйрек аурулары Қант диабеті, Артериялық гипертензия және жүрек-қантамыр жүйесінің патологияларымен тығыз байланысты. Осыған байланысты қазіргі нефрология түрлі медициналық бағыт мамандарының бірлескен еңбегін талап ететін пәнаралық сала ретінде қарастырылуда.

Конференцияға нефролог дәрігерлер, терапевтер, трансплантологтар, оқытушылар мен ғалымдар, медициналық-әлеуметтік сараптама мамандары, сондай-ақ студенттер мен резиденттер қатысты. Мұндай формат қатысушыларға өзара тәжірибе алмасуға және заманауи медициналық технологияларды енгізудің келешегін талқылауға мүмкіндік берді.