Астана медицина университетінде Біріккен Ұлттар Ұйымының Халықты қоныстандыру қорының (UNFPA) Қазақстандағы делегациясымен жұмыс кездесуі өтті. Кездесу барысында медициналық білім беру, ғылым және қоғамдық денсаулық сақтау салаларындағы әріптестікті дамыту мәселелері талқыланды.
Халықаралық делегация құрамына Шығыс Еуропа және Орталық Азия бойынша UNFPA өңірлік директоры Флоренс Бауэр, Қазақстандағы UNFPA өкілі Чинве Огбонна, сондай-ақ ұйымның өңірлік және субөңірлік кеңселерінің сарапшылары кірді.
Университет тарапынан кездесуге стратегиялық даму және халықаралық ынтымақтастық жөніндегі проректор Аян Мысаев, академиялық жұмыс жөніндегі проректор Асем Досанова, Медицина мектебінің деканы Алия Смагулова және халықаралық ынтымақтастық бөлімінің басшысы Салтанат Қасенова қатысты.
Сапар барысында қонақтарға университеттің білім беру, ғылыми және клиникалық қызметіндегі негізгі жетістіктері көрсетілген презентация ұсынылды. Медициналық кадрларды даярлаудың халықаралық сапа стандарттарына және тәжірибеге бағытталған оқытуға негізделген заманауи тәсілдері ерекше қызығушылық тудырды.
Келіссөздер барысында тараптар бірлескен білім беру бастамаларын жүзеге асыру, біліктілікті арттыру бағдарламалары, сараптамалық тәжірибе алмасу және академиялық өзара іс-қимыл мүмкіндіктерін талқылады. Сонымен қатар бірлескен зерттеулер жүргізу және UNFPA халықаралық жобаларына қатысу мәселелері қарастырылды.
Қоғамдық денсаулық сақтау, репродуктивтік медицина және жаңа буын мамандарын даярлау мәселелері бойынша конференциялар, форумдар мен тақырыптық семинарлар ұйымдастыру перспективалары да талқыланды.
Сапар бағдарламасы аясында делегация университеттің симуляциялық орталығына барып, заманауи оқыту технологияларымен танысты. Студенттермен кездесу барысында мансаптық мүмкіндіктер, денсаулық сақтау жүйесіндегі жастардың рөлі және заманауи медицинаның сын-қатерлері талқыланды.
Кездесу қорытындылары тараптардың тұрақты әріптестікті дамытуға өзара мүдделілігін растап, халықаралық деңгейдегі бірлескен бастамалар үшін жаңа мүмкіндіктер ашты.
