Астана медицина университеті Медициналық орталығының базасында аса қауіпті инфекциялардың (АҚИ) алдын алу және олар анықталған жағдайда медицина қызметкерлерінің іс-қимыл алгоритмдеріне арналған оқыту семинары өтті. Іс-шараны университеттің резидентура және клиникалық жұмыс бөлімі «Эпидемиология және биостатистика» кафедрасымен бірлесіп ұйымдастырды.

Семинарға медициналық орталықтың 19 қызметкері қатысты. Кездесудің басты мақсаты – медицина қызметкерлерінің тәжірибелік дағдыларын жетілдіру және эпидемиологиялық қауіп-қатер жағдайларында жедел әрекет етуге дайындық деңгейін арттыру болды.

Семинардың мазмұнды бөлігін эпидемиолог дәрігерлер Шах-Мұрат Спанов пен Дәулет Байбосынов ұсынды. Сарапшылар аса қауіпті инфекциялардың алдын алудың заманауи тәсілдері, биологиялық қауіпсіздік шаралары және күдікті жағдайлар анықталған кезде медициналық қызметтердің өзара іс-қимыл алгоритмдері туралы жан-жақты баяндады.

Талқылау барысында эпидемиологиялық қырағылық, қоғамдық денсаулыққа қауіп төндіретін инфекциялардың клиникалық белгілері, сондай-ақ санитариялық-эпидемиологиялық қызметтерді уақтылы хабардар ету тәртібі мәселелері қарастырылды. Сонымен қатар эпидемияға қарсы режимді сақтау, жеке қорғаныс құралдарын пайдалану және инфекциялардың ауруханаішілік таралуының алдын алу мәселелеріне ерекше назар аударылды.

Іс-шараның тәжірибелік бөлімі қатысушыларға жеке қорғаныс құралдарын дұрыс қолдану және инфекцияның ықтимал өршуі жағдайындағы іс-қимыл дағдыларын пысықтауға мүмкіндік берді.

Аса қауіпті инфекциялар денсаулық сақтау жүйесі үшін негізгі сын-қатерлердің бірі болып қала береді және медициналық ұйымдардың жоғары дайындық деңгейі мен мамандардың жедел әрекет етуін талап етеді.

Осындай оқыту іс-шараларын өткізу медицина қызметкерлерінің кәсіби құзыреттерін нығайтуға, сондай-ақ пациенттер мен қызметкерлердің қауіпсіздік деңгейін арттыруға ықпал етеді.

Семинар қорытындысы бойынша қатысушылар аса қауіпті инфекциялар ошақтары анықталған жағдайда жедел әрекет етуге дайын екендіктерін растады және пациенттермен қауіпсіз жұмыс жүргізу бойынша білімдерін бекітті.