2026 жылғы 28 маусым мен 11 шілде аралығында «Астана медицина университеті» КеАҚ-ның 11 білім алушысы Қытай Халық Республикасының Шэньян қаласында орналасқан China Medical University ұйымдастырған халықаралық жазғы мектепке қатысты. Екі апта бойы қатысушылар цифрлық медицинаның заманауи жетістіктерімен танысып, денсаулық сақтау саласында жасанды интеллектті қолдану мүмкіндіктерін зерделеді, инновациялық білім беру технологияларын меңгеріп, түрлі елдерден келген білім алушылар мен оқытушылармен тәжірибе алмасты.
Оқу қатысушылардың дайындық бағыттарына сәйкес екі мамандандырылған білім беру бағыты бойынша ұйымдастырылды. Қоғамдық денсаулық сақтау және менеджмент мектебінің білім алушылары денсаулық сақтау саласында жасанды интеллект технологияларын қолдануға арналған AI Empowering Healthcare курсын меңгерсе, Медицина мектебінің білім алушылары нейрохирургия мамандарын даярлаудағы заманауи цифрлық шешімдерге арналған Digital Education for Neurosurgery курсын аяқтады. Бағдарлама барысында топқа профессор Г. В. Цой атындағы Хирургия ғылыми-білім беру орталығының доценті Дүйсенбаев Нұржан Нұрланұлы жетекшілік етті.
Жазғы мектеп бағдарламасы China Medical University жетекші профессорлары мен сарапшыларының дәрістерін, практикалық сабақтарды, шеберлік сағаттарын, сондай-ақ университеттің заманауи клиникалық, ғылыми-зерттеу және симуляциялық орталықтарындағы тәжірибелік жұмыстарды қамтыды. Қатысушылар университет клиникаларына, ғылыми-зерттеу зертханаларына және симуляциялық орталықтарға барып, клиникалық жұмысты ұйымдастырумен, диагностика мен емдеудің инновациялық әдістерімен, сондай-ақ медициналық кадрларды даярлаудың заманауи тәсілдерімен танысты.
Білім беру бағдарламасымен қатар қатысушылар үшін мазмұнды мәдени бағдарлама ұйымдастырылды. Олар Қытайдың тарихы мен мәдениетімен танысып, дәстүрлі қытайлық тайцзицюань өнері бойынша шеберлік сабақтарына қатысты, Шэньян қаласының тарихи және мәдени көрікті жерлерін аралады, сондай-ақ түрлі елдерден келген қатысушылармен халықаралық академиялық және кәсіби байланыстарын нығайтты.
Оқу қорытындысы бойынша барлық қатысушылар бағдарламаны сәтті аяқтап, білім беру курстарын меңгергенін растайтын халықаралық сертификаттарға ие болды.
Халықаралық ынтымақтастық бөлімінің Instagram сілтемесі: International Office of Astana Medical University (@international_amu_official).
