Қазақстандық мамандар «Тәжікстандағы Қазақстан медицинасының күндері» аясында Тәжікстандық әріптестерімен озық клиникалық тәжірибелерімен бөлісті. Кәсіби бағдарламаның негізгі қатысушыларының бірі - Астана медицина университетінің Жүрек ырғағы ғылыми-зерттеу институтының директоры, профессор Аян Абдрахманов.
«Тәжікстандағы Қазақстан медицинасының күндері» кәсіби диалог, клиникалық тәжірибе алмасу және отандық медицинаның заманауи мүмкіндіктерін таныстыруға арналған маңызды алаңға айналды. Сапар барысында интервенциялық кардиология мен заманауи аритмологияны дамытуға ерекше назар аударылды. Бүгінде бұл бағыттар белсенді дамып, клиникалық тәжірибеге кеңінен енгізілуде.
Профессор Аян Абдрахманов тәжікстандық әріптестеріне жүрек-қантамыр ауруларын диагностикалау мен интервенциялық емдеудің заманауи әдістерін таныстырып, күрделі электрофизиологиялық және эндоваскулярлық араласуларды жүргізудегі практикалық тәжірибесімен бөлісті.
Алты операция - диагностикадан күрделі интервенциялық араласуларға дейін
Практикалық бағдарлама аясында 3 шеберлік сабағы өткізіліп, оның барысында 6 интервенциялық операция жасалды. Олардың қатарында атриовентрикулярлық түйіндік реципрокты тахикардияға (АВУРТ), соның ішінде оның атипиялық түріне байланысты емдік процедуралар, электрофизиологиялық зерттеу (ЭФЗ), коронарография және оң коронарлық артерияға (ОКА) стенттеу жүргізілді.
Практикалық бөлім заманауи технологияларды көрсетіп қана қоймай, клиникалық тәжірибе жағдайында пациенттерді жүргізу тактикасын талқылауға мүмкіндік берді.
Дәрістен - нақты клиникалық тәжірибеге
Бағдарламаның маңызды бөлігі профессор Абдрахмановтың «Аритмияларды емдеудің интервенциялық әдістері» тақырыбындағы дәрісі болды. Баяндама барысында жүрек ырғағы бұзылыстарын диагностикалаудың заманауи тәсілдері, электрофизиологиялық зерттеулердің мүмкіндіктері және аритмияларды емдеудің катетерлік әдістері қарастырылды.
Мамандар үшін күрделі клиникалық жағдайларды талқылап, интервенциялық аритмология саласында мол тәжірибесі бар сарапшыдан практикалық ұсыныстар алу мүмкіндігі ерекше құнды болды.
Сапар аясында пациенттерге консультациялар да жүргізілді. Клиникалық жағдайларды бірлесіп талқылау кәсіби диалогтың маңызды бөлігіне айналып, мамандарға диагностика мен емдеудің оңтайлы тактикасын таңдау бойынша пікір алмасуға мүмкіндік берді.
Қазақстан – Тәжікстан: медициналық тәжірибе арқылы ынтымақтастық
Бағдарламаға қатысушылардың пікірінше, мұндай кездесулер екі ел арасындағы медициналық ынтымақтастықты дамытуда ерекше маңызға ие. Кәсіби тәжірибе алмасу тек дәрістер мен конференциялар форматында ғана емес, тікелей операциялық залда да жүзеге асады. Мұнда білім мен тәжірибе нақты клиникалық нәтижеге ұласады.
Тәжікстандық мамандармен кездесулер барысында заманауи аритмология мен интервенциялық кардиологияның өзекті мәселелері, кәсіби өзара іс-қимылды одан әрі дамыту, тәжірибе алмасу және бірлескен білім беру бастамаларын жүзеге асыру мүмкіндіктері талқыланды.
Профессор Аян Абдрахмановтың «Тәжікстандағы Қазақстан медицинасының күндеріне» қатысуы халықаралық кәсіби байланыстарды нығайту және жүрек-қантамыр ауруларын диагностикалау мен емдеудің заманауи интервенциялық әдістерін ілгерілету жолындағы маңызды қадам болды.
Астана медицина университеті үшін халықаралық ынтымақтастықты дамыту медициналық білім беру, ғылым және клиникалық тәжірибе сапасын арттыру жұмысының маңызды бағыты болып табылады. Мұндай бастамалар қазақстандық мамандарға отандық медицинаның жетістіктерін шетелде таныстырып қана қоймай, шетелдік әріптестермен тұрақты кәсіби серіктестік орнатуға мүмкіндік береді.
