Төрегелді Шарманов атындағы Ұлттық медицина университетінің студенттері бір қате шешімнің адам өмірін қалай өзгертетініне көз жеткізді. Телемост арқылы олар есірткі саудасы үшін сотталғандармен кездесті.

Әңгімеге Астана қаласы бойынша Қылмыстық-атқару жүйесі департаментінің қызметкерлері, Полиция департаментінің Есірткі қылмысына қарсы іс-қимыл басқармасының өкілдері және есірткі құқық бұзушылықтарының профилактикасы жөніндегі хатшы Мирзада Сейткали қатысты.

Кездесудің негізгі бөлігі сотталған азаматпен онлайн әңгіме болды. Ол өз өмірінің оқиғасымен бөлісіп, есірткі қолдану мен таратудың салдары туралы айтты. Студенттер заң терминдерінің астарында нақты адамның тағдыры және салдары ұзақ жылдарға созылатын шешімдер тұрғанын көрді.

Кездесу ашық диалог форматында өтті. Студенттер жеке жауапкершілік, заңды сақтау және есірткінің заңсыз айналымына тартылудан сақтану мәселелерін талқылады.

Болашақ медицина мамандары үшін бұл тақырыптың кәсіби маңызы да бар. Олар тәуелділіктен денсаулығы мен өмірі зардап шеккен адамдарға көмек көрсетеді. Сондықтан мәселенің мәнін түсіну, ол туралы ашық сөйлесе білу және профилактикаға қатысу студенттік кезден бастап маңызды.