Ташкентте өткен Түркітілдес елдер кардиологтарының III құрылтайында жүрек-қан тамырлары ауруларын диагностикалау мен емдеудің заманауи тәсілдері талқыланды. Төрегелді Шарманов атындағы Ұлттық медицина университетінің ғылыми зерттеулерін №3 ішкі аурулар кафедрасының доценті Л.И. Жусупбекова мен PhD докторанты Д.А. Нуркина таныстырды.
«Заманауи кардиология: профилактикадан жоғары технологияларға дейін» тақырыбындағы құрылтай 2–3 қазанда өтіп, Орталық Азия, Еуропа елдерінен, АҚШ, Ресей, Әзербайжан және Түркиядан келген мамандарды біріктірді. Талқылаудың басты назарында жүрек-қан тамырлары ауруларын дәлірек анықтауға және әр пациенттің ерекшеліктерін ескере отырып ем таңдауға мүмкіндік беретін жаңа технологиялар болды.
Ғылыми бағдарламаның бір тақырыбы гендерді, ақуыздарды және зат алмасу өнімдерін зерттейтін омикалық медицинаға арналды. Бұл зерттеулер жүрек пен қан тамырлары ауруларының даму жолдарын тереңірек түсінуге, оларды ерте анықтауға және жеке қауіп деңгейін бағалауға мүмкіндік береді.
Омикалық медицина секциясында Л.И. Жусупбекова мен Д.А. Нуркина жүрек-қан тамырлары ауруларының молекулалық механизмдері туралы баяндама жасады. Олар зерттеу нәтижелерін ұсынып, әріптестерімен осы білімді дербестендірілген медицинада қолдану перспективаларын талқылады.
Қатысушылар шетелдік мамандардың зерттеулерімен танысып, әріптестерімен тәжірибе алмасты. Кәсіби талқылауларда жаңа ғылыми тәсілдер мен алдағы ынтымақтастық мүмкіндіктері сөз болды.
Суретте: Жусупбекова Л.И. және Нуркина Д.А., профессор Анджей Янушевичпен (Польша) бірге Еуропалық артериялық гипертензия қоғамы (ESH), және доктор Анна Вачулова, PhD. (Словакия), Словакияның артериялық гипертензияға қарсы лигасының вице-президенті.
