«Зертханалық медицинадағы инновациялық шешімдер: халықаралық тәжірибе мен жетістіктер» тақырыбында халықаралық қатысумен III ғылыми-практикалық конференция өтті. Төрегелді Шарманов атындағы Ұлттық медицина университеті Қазақстандық медициналық зертханалар қауымдастығымен (КАМЛАБ) бірлесіп, іс-шараның ұйымдастырушысы болды.
Конференция зертханалық диагностика, денсаулық сақтау, ғылым және медициналық технологиялар саласындағы 1 718 маманды біріктірді: 494 қатысушы офлайн, тағы 1 224 маман онлайн қатысты. Кәсіби диалогқа Қазақстан, Қырғызстан, Беларусь, Ресей, Өзбекстан, Бельгия, Германия және басқа да елдердің өкілдері қосылды.
Университеттің конференцияны ұйымдастыруға қатысуы медициналық білім, ғылым және практикалық денсаулық сақтау арасындағы өзара байланысты нығайтуға ықпал етті. Іс-шара шетелдік әріптестермен тәжірибе алмасуға және зертханалық диагностиканың сапасы мен қолжетімділігін арттыратын технологияларды талқылауға арналған алаңға айналды.
Ғылыми бағдарлама аясында 56 отандық және шетелдік спикер баяндама жасады. Зертханалық қызметті цифрлық трансформациялау, жасанды интеллектіні қолдану, зерттеулерді автоматтандыру, молекулалық-генетикалық диагностика және сапаны басқару негізгі тақырыптар болды. Қатысушылар зертханалық көмекті ұйымдастыру және денсаулық сақтаудың мемлекеттік және жеке секторларының өзара іс-қимылы мәселелерін де қарастырды.
Бағдарлама аясында мамандандырылған көрме ұйымдастырылып, 18 компания диагностикалық жабдықтарды, реагенттер мен заманауи технологиялық шешімдерді ұсынды. Қатысушылар жаңа әзірлемелермен танысып, оларды клиникалық практикада қолдану мүмкіндіктерін талқылады.
