МӘМС негіздері мен пациенттердің құқықтары елордалық медицина университетінің оқу бағдарламаларында оқытылатын болады. Ынтымақтастық туралы «Әлеуметтік медициналық сақтандыру қоры» КеАҚ және «Астана медицина университеті» КеАҚ арасында тиісті келісімге қол қойылды.

Құжат АМУ студенттерін міндетті әлеуметтік медициналық сақтандыру жүйесінің жұмыс істеу негіздеріне дайындауға, МӘМС пациенттерінің құқықтарын оқытуға және азаматтық жауапкершілікті қалыптастыруға бағытталған.

«Меморандумға қол қою білікті мамандарды даярлау және міндетті әлеуметтік медициналық сақтандыру саласында озық тәжірибелерді енгізу үшін жаңа мүмкіндіктер ашатын «МӘМС академиясы» жобасын дамытудағы маңызды қадам болып табылады», - Қор Басқарма төрағасының орынбасары Индира Саркенова атап өтті.

Ол сондай-ақ Қор МӘМС жүйесін жетілдіру және болашақ мамандарды даярлау деңгейін арттыру үшін жағдай жасай отырып, жоғары оқу орындарымен және білім беру орталықтарымен ынтымақтастықты кеңейтуді жалғастыратынын жеткізді.

Өз кезегінде Астана медицина университетінің ректоры Анар Тұрмұхамбетова бұл келісім МӘМС жүйесін білім беру процесіне интеграциялаудың маңызды кезеңі болғанын атап өтті.

«Студенттерді МӘМС-тің негізгі аспектілеріне оқыту олардың кәсіби құзыреттілігін арттырып қана қоймай, медициналық сақтандыру мәселелеріне жауапкершілікпен қарауды қалыптастыруға мүмкіндік береді. Бұл жоба денсаулық сақтау саласындағы болашақ дәрігерлер мен консультанттарды даярлауға елеулі үлес қосатынына сенімдіміз», - деп түйіндеді Анар Тұрмұхамбетова.

МӘМС академиясының мақсаты – міндетті әлеуметтік медициналық сақтандыру тетігі арқылы медициналық қызметтерге қол жеткізуді қамтамасыз ететін денсаулық сақтау жүйесінде жұмыс істейтін мамандардың білім деңгейі мен құзыреттілігін арттыру.