Астана медицина университетінде көктемнің жарқын мерекесі – Наурыз мейрамы ерекше көңіл-күймен тойланды. Университет ауласында үлкен қазан көтеріліп, барлық қонақтарға дәмі тіл үйірер палау ұсынылды. Мерекенің басты сәні – қазақтың киіз үйі болды. Онда дәстүрлі қазақы бұйымдар қойылып, қонақтар ұлттық нақыштағы безендірулерді тамашалап, қазақ халқының мәдениетімен жақын танысты.
Наурыз мейрамының ажырамас бөлігі – ұлттық ойындар. Осыған орай, университеттің спорт залында білектілер мен күштілер сынға түскен сайыстар өтті. Арқан тарту, қол күрес және басқа да спорттық жарыстар қатысушылар мен көрермендерге ерекше әсер сыйлады.
Мерекелік іс-шараның шарықтау шегі – студенттердің ұйымдастыруымен өткен концерт болды. Онда қазақ, үнді және басқа да тілдерде әндер шырқалып, ұлттық билер орындалды, сондай-ақ музыкалық аспаптарда тамаша туындылар орындалды.
«Наурыз – жаңа өмірдің бастамасы, бейбітшілік пен жақсылықтың белгісі. Ол бізге өзара көмек, дәстүрге құрмет, білім мен даму жолындағы талпыныстың маңыздылығын еске салады. Бұл мереке адамдарды біріктіріп, жүректеріне қуаныш, үйлеріне жылулық пен береке әкеледі. Астана медицина университеті – тек білім ордасы ғана емес, сондай-ақ ғылым мен медицинаға, халыққа қызмет етуге өмірін арнаған жандардың үлкен қауымдастығы. Біздің академиялық отбасымызда әрдайым мейірімділік, өзара түсіністік және биік белестерге ұмтылыс үстемдік етсін! Баршаңызға мықты денсаулық, оқуда және еңбекте табыс, амандық пен ашық аспан тілеймін! Бұл шуақты мереке сіздерге жарқын эмоциялар, бақыт және жаңа мүмкіндіктер әкелсін!» – деді Астана медицина университетінің ректоры Анар Турмұхамбетова.
Мерекелік шара жеңімпаздарды марапаттау рәсімімен аяқталды. Барлық қатысушылар лайықты сыйлықтар мен қошеметке ие болды, ал мереке әркімнің жүрегінде Достық, дәстүр және нағыз көктемгі көңіл-күй туралы жақсы естеліктер қалдырды.
Астана медицина университеті баршаңызды Наурыз мерекесімен құттықтайды және амандық, үйлесімділік пен жаңа жетістіктер тілейді!