Астана медицина университетінің студенттері 18-21 наурыз аралығында Мәскеудегі Сеченов өмір туралы ғылымдар университетінің базасында өткен «Қауіпсіздік аймағы» шұғыл медициналық көмек бойынша халықаралық олимпиадаға қатысты. Іс-шараға Ресей, Қазақстан, Қырғызстан, Өзбекстан, Беларусь, Әзірбайжан, Тәжікстан, Шри-Ланка және т.б. елдерден 129 команда жиналды.

Біздің университеттің командасы «Емдеу ісі» мамандығы бойынша білім алатын алты студенттен құралды. Үш күн ішінде олар олимпиаданың әртүрлі кезеңдерінен өтті: теориялық тапсырмалар мен клиникалық жағдайларды талдаудан бастап, жедел жәрдем сценарийлеріне дейін – қабылдау бөлмесінде, ұшақ бортында, ашық далада және тіпті тау бөктерінде. Студенттер eFAST-диагностика, трахея интубациясы, жүрек-өкпе реанимациясы, төтенше жағдайларда зардап шеккендерге көмек көрсету, әртүрлі зақымдану аймақтарынан эвакуациялау, сондай-ақ алғашқы тексеруді ұйымдастыру және реанимобильде көмек көрсету сияқты күрделі тапсырмаларды орындау кезінде сенімді білім мен практикалық дағдыларды көрсетті.

Ерекше назар топтық жұмысқа, тактикалық ойлауға және күйзеліс жағдайында шешім қабылдау қабілетіне аударылды. Олимпиаданың құрылымына капитан конкурстары, теориялық тапсырмалар, семинарлар, құтқару тізбегі, қабылдау бөлмесіндегі жұмыс және алғашқы көмек станциясының тапсырмалары кірді. Іс-қимылдардың үйлесімділігі, жоғары теориялық дайындығы мен практикалық дағдыларының арқасында Астана медицина университетінің командасы олимпиаданың барлық кезеңдерінен сенімді өтіп, үздіктер қатарынан көрінді.

«Қауіпсіздік аймағына» қатысу студенттерге өз мүмкіндіктерін сынап, жаңа білім мен дағдыларды меңгеруге, сондай-ақ Қазақстанды халықаралық аренада таныстыруға мүмкіндік беретін маңызды кәсіби тәжірибе болды. Олимпиада біздің университет студенттерінің жоғары дайындық деңгейін және олардың ең күрделі медициналық жағдайларда әрекет ету қабілетін дәлелдеді.