Ақтау қаласында бариатриялық және метаболикалық хирургиядағы асқынулардың алдын алу, диагностикасы және емделуіне арналған «Орталық Азиядағы алғашқы халықаралық бариатриялық клуб саммиті» – First IBC Central Asia Summit & 70th IBC & Second IBC Central Asia Symposium өтті. Бұл ғылыми алаң Қазақстан, Ресей, Ұлыбритания, Өзбекстан, Қырғызстан, Моңғолия және Тәжікстанның жетекші мамандарын біріктірді.

Аталған ауқымды шараны ұйымдастырған – медицина ғылымдарының докторы, Астана медицина университетінің хирургиялық аурулар, бариатриялық хирургия және нейрохирургия кафедрасының профессор-зерттеушісі Орал Оспанов.

Орал Оспановтың айтуынша, бариатриялық және метаболикалық хирургия – салыстырмалы түрде жаңа бағыт.

– Қазіргі таңда отадан кейінгі асқынулар жиі кездеседі. Сондықтан біз Орталық Азия елдерінің бариатриялық және метаболикалық хирургтарын біріктіріп, хирургиялық асқынулар бойынша Консенсус қабылдауды жөн көрдік. Бұл – операциядан кейінгі асқынулардың алдын алу, ерте диагностика жасау және емдеу тәсілдерін біріктіру деген сөз. Мұның бәрі нәтижелерді жақсарту үшін өте маңызды, – деп атап өтті профессор.

Қатысушылардың пікірінше, бұл Саммит Орталық Азияда бариатриялық хирургияны дамыту жолындағы серпінді алаңға айналды. Кездесудің басты нәтижесі – бариатриялық және метаболикалық хирургия саласындағы бірқатар мәселелерді шешуге жол ашатын маңызды құжат – хирургиялық асқынулар бойынша Консенсустың қабылдануы болды.