Бүгінгі таңда дәрігерді даярлау тек оқулықтағы біліммен шектелмейді, ол клиникалық жағдайда жылдам бағдар табу, шешім қабылдау және командада тиімді жұмыс істеу қабілеттерін талап етеді. Дәл осы дағдыларға Астана медицина университеті №2 отбасылық медицина кафедрасында ерекше назар аударылады. Мұнда бірнеше жылдан бері Team-Based Learning (TBL) және Case-Based Learning (CBL) сияқты заманауи білім беру тәсілдері белсенді түрде қолданылып келеді.

Бұл әдістер 6–7 курс интерндерін оқытуда пайдаланылады және оқу үдерісін шынайы клиникалық тәжірибеге барынша жақындатуға мүмкіндік береді. Ақпаратты пассивті түрде қабылдаудың орнына, студенттер командаларда жұмыс істеп, клиникалық жағдайларды талдайды және дәрігердің күнделікті тәжірибесіне тән шешім қабылдау дағдыларын қалыптастырады.

Ең жиі кездесетін ауруларды талдауға ерекше көңіл бөлінеді. Мәселен, артериялық гипертензия тақырыбы бойынша сабақтары профессор Айман Сайлаубековна Керимкулова жетекшілігімен өтеді. Интерндер нақты клиникалық жағдайларды талдап, ұлттық және халықаралық ұсынымдарды қолданады, диагностика мен жүрек-қантамырлық қауіптерді бағалаудың заманауи тәсілдерін меңгереді.

Сол сияқты, қант диабеті тақырыбындағы сабақтар да тәжірибеге бағытталған сипатта өтеді, оларды доцент Алишер Саугабаевич Идрисов жүргізеді. Сабақ барысында интерндер клиникалық жағдайларды саралап, пациенттерді жүргізу тактикасын құруды үйренеді, сондай-ақ ұзақ мерзімді бақылау мен асқынулардың алдын алу мәселелеріне назар аударады.

Мұндай оқыту форматы ақпаратты жай ғана есте сақтауға емес, клиникалық шешімдердің логикасын түсінуге, өз ұстанымын дәлелдеуге және әріптестермен тиімді өзара әрекеттесуге мүмкіндік береді.

TBL және CBL әдістерін жүйелі түрде енгізу интерндердің оқу үдерісіне белсенді қатысуын арттырып, дербес клиникалық ойлауын дамытады және болашақ дәрігерлерді денсаулық сақтау жүйесінің нақты жағдайында жұмыс істеуге дайындайды. Бұл заманауи медицина талап ететін білікті мамандарды сапалы даярлауға бағытталған маңызды қадам.