Қазақстан астанасында Қазақстан мен Түркиядан 200-ден астам дәрігер, оқытушы, жас ғалым және резидентті біріктірген «Шығыс педиатрлар қауымдастығы – TİKA» үш күндік ғылыми-білім беру бағдарламасы өтті.
14–16 қыркүйек аралығында қазақстандық және түркиялық педиатрлар арасында ашық ғылыми диалог орнатуға мүмкіндік берген ауқымды кәсіби кездесу өтті. Бағдарламаны Түркияның Шығыс педиатрлар қауымдастығы Астана қаласының педиатрлар қауымдастығы» ҚБ-мен бірлесіп, «Тамақтану, өсу және даму» жобасы аясында Түрік ынтымақтастық және үйлестіру агенттігі (TİKA) өкілдігінің қолдауымен ұйымдастырды.
Бағдарлама жұмысына TİKA-ның Қазақстандағы Бағдарламаларды үйлестіру кеңсесінің координаторы Фуат Ердогмуш (Fuat Erdoğmuş), Шығыс педиатрлар қауымдастығының негізін қалаушы, Диярбакыр балалар ауруханасының бас дәрігері, доцент, доктор Серһат Саманджи (Serhat Samancı), сондай-ақ Түркияның жетекші мамандары – профессор Эргин Чифтчи (Ergin Çiftçi), доцент Осман Акдениз (Osman Akdeniz), профессор Чапан Конджа (Çapan Konca), профессор Ильяс Йолбаш (İlyas Yolbaş) және доцент Исмет Резани Топтанджи (İsmet Rezani Toptancı) қатысты.
Кездесудің басты қағидаты – практикалық бағыттылық болды. Қатысушылар заманауи тәсілдерді таныстырып қана қоймай, оларды нақты клиникалық тәжірибеде қалай тиімді қолдануға болатынын талқылады.
Бағдарламаның алғашқы күні инфекциялық ауруларға, шұғыл көмек көрсетуге және қарқынды терапияға арналды. Қатысушылар сепсис пен ауыр инфекциялар кезіндегі күрделі клиникалық жағдайларды талдап, жүрек ырғағының бұзылыстарын, сирек кездесетін қызбалық синдромдарды және аутизм спектрі бұзылыстарын талқылады.
Екінші күн респираторлық медицина, кардиология, нутрициология және неонатология бағыттарын қамтыды. Стрептококк инфекциялары, ұйқы мен тыныс алу бұзылыстары, туа біткен жүрек ақаулары бар балаларды бақылау, неврологиялық аурулары бар пациенттерге нутритивтік қолдау көрсету, респираторлық терапия және терең шала туған нәрестелерді жүргізу мәселелері қаралды.
Бағдарламаның қорытынды күні кәсіби күн тәртібін одан әрі кеңейтті. Мамандар жедел ревматикалық қызба мен ауруханадан тыс пневмониядан бастап, сирек кездесетін аурулар, РСВ-инфекциясы, асқазан-ішек жолының эозинофильді аурулары және балаларға қарқынды медициналық көмек көрсетуді ұйымдастыру мәселелеріне дейін талқылады. Бағдарлама алаңдатарлық белгілерді дер кезінде анықтау және медициналық бақылаудың сабақтастығын қамтамасыз ету мәселелеріне арналған пәнаралық пікірталаспен қорытындыланды.
Сапардың маңызды бөлігі Медициналық университет Астана басшылығының Шығыс педиатрлар қауымдастығы және TİKA өкілдерімен кездесуі болды. Тараптар медициналық білім беру, ғылыми және клиникалық қызмет салаларындағы одан әрі ынтымақтастық мүмкіндіктерін талқылады. Перспективалы бағыттардың қатарында бірлескен білім беру және ғылыми жобаларды іске асыру, академиялық ұтқырлық, оқытушылар мен сарапшылар алмасуы, сондай-ақ жас мамандарды қолдау мәселелері атап өтілді.
Осылайша, үш күндік бағдарлама білім мен тәжірибе алмасу алаңы ғана емес, жаңа кәсіби байланыстарды қалыптастыруға мүмкіндік берген маңызды платформаға айналды. Қазақстан мен Түркия педиатрия саласындағы ынтымақтастықты одан әрі дамытып, ғылыми әлеуетті, клиникалық тәжірибе мен білім беру мүмкіндіктерін біріктіруде.
